熱刺省招牌大派復活蛋

猪拉多纳

09/04/2012

熱刺英超前四位置危危乎，今輪主場對諾域治不容再失，主帥夏利列納唔想畀人拆招牌，即使有足總盃後顧，已吩咐球員當今場係決賽踢，實行喪攻諾域治，預期今場多入波，蘇豪捧大。


（有線300及200台周一晚10時直播）


英超四哥熱刺上場作客新特蘭失兩分，依家只領先車路士同紐卡素兩分，若然再有差池，就會跌咗價值連城嘅歐聯席位，到時喊都無謂。自從傳出夏利列納會教英格蘭國家隊後，熱刺表現確係跌咗Watt；為免孭鑊，夏利叔都要激勵班兵，避免整臭自己個朵，絕對唔可以眼白白睇住球隊失去喺歐聯掘金嘅機會。

諾域治一味靠撞

諾域治睇落冇乜過人之處，但勝在硬橋硬馬，大舊射手格蘭荷特毫不起眼，但效率真係好高，一味死衝死撞，威脅好大。熱刺擁有艾迪巴約、雲達華治，加里夫巴利同莫迪歷等星級球員，呢個豪華進攻陣容不遜英超任何球隊，返主場專心踢好呢場波，唔愁冇士哥，結合大軍近七次主場出擊六場開大，追大啦！