北京水貨多東京未驚過

猪拉多纳

17/04/2012
文： 走肖

亞冠盃分組賽再爆中日大戰，FC東京今晚喺F組主場再遇FC北京，主W1.4倍熱都要捧。雖然東京陣容不整，只不過北京更加大鑊，教練摩連奴柏捷高承認6個外援冇個啱用，咁嘅情況邊似惡得出？（now671台周二晚6：30直播）


原本東京重返日職後氣勢相當勁，但受到傷兵問題困擾，佢哋喺聯賽主場以0：1不敵鹿島鹿角後，近4場得1勝1和2負，而且隊長尾山陽平、中場河野廣貴同後衞加賀健一未好番，門將權田修一剛啱喺聯賽傷埋，加上後衞高橋秀人停賽，驟眼睇唔多穩陣。

北京殘陣 隊長徐雲龍停賽

不過北京引援完全失敗就仲麻煩，之前作客以0：0打和大連，全場90分鐘得4次射門，而且冇1次中目標，今場更有隊長徐雲龍停賽，中場邵佳一胃痛冇隨隊，兼且後衞法蘭斯高施尼、雷滕龍同門將楊智全部養緊傷，即使兩星期前同東京踢成1：1都追唔過。


其實北京教練摩連奴柏捷高都承認，佢親自揀嘅6個外援冇個對辦，特別係上季塞爾維亞聯賽神射手卡路迪洛域，據講轉會費高達150萬歐元，係全隊身價最高，點知加盟後完全撻唔着，更被國內傳媒形容為「腳軟男」，摩連奴柏捷高都講到明，考慮喺6月中超轉會市場重開時大清洗，靠依家班水貨想唔輸都難。