拜仁內訌難敵銀河艦隊

猪拉多纳

23/04/2012
文： 阿水

尋日凌晨開打嘅西班牙國家打吡，阿水都有捱眼瞓睇埋，皇馬屈辱多年，終於吐氣揚眉砌低巴塞，西甲封王已經冇乜懸念，剩低嘅目標就梗係贏埋歐聯做雙冠王啦！


阿水有老友今年由德國移居去西班牙，正正就住喺馬德里，佢同阿水講，雖然個個以為歐聯係歐洲球壇至高榮譽，但查實喺當地人心目中，聯賽冠軍先至係關乎球隊榮辱，踢歐聯其實係搵錢至上。佢話上星期佢仲諗住撲幾張皇馬喺季尾對西維爾同馬略卡嘅主場波飛，諗住感受捧盃氣氛，點知一早售罄。之後佢決定博博睇睇有冇歐聯對拜仁門票，反而仲有得買，不過睇家陣個勢，相信都好快售罄。

皇馬讓一球夠狠

嚟緊周中兩場焦點歐聯戰，都係莊家搵大錢目標，估計投X額都會再創高峰，特別係皇馬、巴塞都係落後嗰隊，捧場客肯定唔少。阿水問過班莊家老友，個個都話巴塞輸咗個聯賽，肯定想贏番場歐聯補數，但睇過佢剛戰對皇馬嘅演出，成班主力狀態都麻麻，其實未必可以反勝車仔。相反皇馬讓一球睇落仲穩陣，話晒銀河艦隊氣勢好，拜仁又爆出列貝利唔妥洛賓，皇馬主場讓一球，坐走望贏啦！