加利卡希爾上「車」學嘢多

猪拉多纳

24/04/2012

車路士自迪馬堤奧接手後戰績冒升，背後原來有「加泰組合」撐住！英國《太陽報》報道，加利卡希爾同泰利係不敗保證，同時上陣未曾輸過波。以往試過被外借到英冠球隊嘅加利卡希爾就話，依家佢身邊全部係頂級球員，練波學到唔少嘢，所以愈踢愈好。

賣口乖多謝迪馬堤奧提攜

泰利養傷期間，加利卡希爾同大衞雷斯拍檔踢中堅，車仔輸過畀拿玻里、西布朗同曼城，但如果加利卡希爾同泰利合作，無論英格蘭國家隊抑或車路士都冇輸過，現年26歲嘅加利卡希爾咁講：「我覺得已經得到想要嘅嘢，能夠同車路士球員操練，你肯定好起勁，而且你會明白，呢度冇人可以保證打正選。」


諗番被外借至般尼同錫菲聯踢英冠，加利卡希爾好識做咁話，感激領隊迪馬堤奧提攜：「保亞斯離開後，我覺得好難接受，當時我剛啱賣咗保頓間屋，住喺倫敦嘅酒店。但迪馬堤奧上任後，一切好番晒，佢所有決定都得到我哋正面回應。至於美斯，你必須要每秒鐘睇實佢，稍為分心就會出事。」