萊切護級搶分焗做大騷

猪拉多纳

05/05/2012
文： 走肖

一隊要搶分護級，一隊踢風流波，萊切今晚意甲主場對費倫天拿，入球大最抵玩。形勢上萊切和都冇着數，費倫就剛爆出教練迪里奧羅斯動粗「體罰」新仔拿積，即時被炒嘅鬧劇，加上兩隊有大批球員缺陣，癲鬥癲入波好容易。（開賽時間：周日凌晨0：00直播）


周中作客符碌以1：1逼和祖雲達斯後，現時萊切距離護級安全線3分，假如今場唔贏，煞科戰作客基爾禾可能變成例行公事，而且萊切傷兵滿營嘅同時，前鋒古達度、路爾斯梅利爾同後衞卡路斯利今場全部停賽，正選陣容要再次大執。既然萊切要搶分護級冇得死守，今場唔似會保持清白，有利開入球騷。


另方面，費倫周中喺主場以2:2打和路華拿，拿積不滿上半場被調走玩嘢拍手，結果被教練迪里奧羅斯打到佢喊。賽後費倫即炒迪里奧羅斯，意大利聯賽會罰佢停賽3個月，拿積道完歉依然被內部停賽至今季結束，現時費倫暫時由球會經理古連尼帶隊，傷兵成籮佢根本搞唔掂，唔想衰得太肉酸，鬥攻似乎係唯一出路。