歐國盃：小器鶴臣寧選馬田基利

猪拉多纳

英格蘭爆內亂？因不滿米卡李察士早前拒絕入選後補名單，英格蘭領隊鶴臣進行大報復，嚟緊對挪威場熱身賽，就算唔夠人用都唔選呢位曼城奪標功臣，反而揀利物浦二打六馬田基利，認真小器！
熱身賽鬥挪威 車手未歸隊

因為已經有格連莊臣同菲爾鍾斯，曼城右閘米卡李察士早前意外落選英格蘭歐國盃23人大軍，據報英格蘭當時希望米卡李察士加入後補名單，但呢位曼城球星由於嬲鶴臣無直接打畀佢解釋，只係搵皮雅斯傳話，覺得冇誠意於是一口拒絕。

近日英格蘭正備戰作客挪威嘅熱身賽，但因為一班車路士球星仍未歸隊，鶴臣於是搵人湊腳，本來外間認為米卡李察士係大熱，點知鶴臣為報復米卡之前請佢食檸檬，竟然補選利物浦右閘馬田基利入伍。其實英格蘭已經有熱刺右閘基爾獲加、曼聯後衞基斯史摩寧因傷踢唔到歐國盃，可以踢右閘同中堅嘅米卡李察士本來好使好用，但鶴臣今次玩小器攞英格蘭前途嚟搞，似「小學雞」行為多啲喎。