納比亞冠首演撐廣州

猪拉多纳

中超富豪球會FC廣州於亞冠盃十六強主場撲擊日職FC東京，廣州人強馬壯，更有名帥納比領軍，星味滿瀉，會方重金禮聘納比志在稱霸亞洲，今戰不容有失，據報廣州喺亞冠贏一場有過千萬獎金，重賞之下必有勇夫，賽制一場定勝負，唔使諗留力問題，主勝有計！（now 670周三晚8時直播）

FC廣州老細許家印揮金如土，廣邀名將，當中以阿根廷球星孔卡名氣最大，身價最高。廣州覓得良將，再簽名帥，豪花過億元年薪請到意大利「銀狐」納比出山。納比貴為世界級領隊，唔單止要助球隊衞冕中超，仲要以稱霸亞洲為目標，其領軍經驗豐富，連世界盃都贏過，區區一場亞冠盃賽事，難唔到呢位傳奇教頭嘅！
柏雷素爾勢勁唔赦現代

日職升班馬FC東京今屆參戰亞冠盃，成功突破分組賽有晒交代，今次硬撼中超班霸廣州，主帥普波域賽前聲大大話唔怕對手，仲笑住話納比已經過氣，來者不善。不過礙於資金有限，東京外援質素唔及對手，只能以整體戰抗敵，球隊今屆分組賽作客同FC北京打成平手，今次面對開出千萬獎金嘅廣州更加難踢，東京好難頂得住。

同日另一支日職球隊柏雷素爾作客韓職蔚山現代，柏軍季初兼顧聯賽同亞冠盃雙線作戰，一時間未能適應，戰績甚曳，直到近期先重新撻着狀態，近四戰贏晒，包括作客戰勝南韓名牌全北汽車，今戰可保不敗，要柏雷素爾「讓球客勝」！