日本迎約旦撐1.53倍「主勝」

猪拉多纳

2014世盃外圍賽亞洲區十強賽繼續開戰，B組嘅日本今晚喺埼玉主場對約旦，1.53倍「讓球主勝」值得再追。除咗本田圭佑＋香川真司超班組合，同時打正選共取得9勝2和之外，隊長長谷部誠更發起「燒肉大會」團結士氣，睇怕會再開入球騷慶祝香川真司落實加盟曼聯！（now671台周五晚6:30直播）

埼玉2002體育場係日職最爆嘅浦和紅鑽主場，日本安排十強賽喺呢度上演擺明係貪人氣夠旺，而且佢哋喺B組首戰以3:0解決阿曼，獲得重召後改着4號波衫嘅本田圭佑為日本先開紀錄，證明「新生本田」的確有料到。贏完波，教練沙哲朗尼日前安排球員喺夜晚自由活動，長谷部誠帶隊開「燒肉大會」，士氣冇得彈。
搞燒肉大會提升士氣

據講呢次勁食由日本足協出錢，「燒肉大會」被視為東瀛民眾聯絡感情最佳活動之一，今次日本強陣出擊，香川真司上場因為遷就本田圭佑，大部分時候移到左路發動攻勢，最終得1次助攻鋒芒未盡露，不過曼聯官方已落實會羅致佢，相信香川會嚟料慶祝登陸英超。
約旦首戰和伊拉克

對家約旦首戰以1:1逼和伊拉克，證明唔係魚腩，不過佢哋班底實力太弱，全隊得皇家馬德里青訓出身嘅前鋒巴華比有啲睇頭，依家佢淪落到喺羅馬尼亞球會加斯梅登搵食，好打有限，何況現時日本正選位置競爭激烈，維迪斯中鋒夏雲拿同阿仙奴翼鋒宮市亮等住出場搏殺，唔似會放過約旦囉！

賽制：

今輪為第4圈，10支球隊分成兩組，踢雙循環分組賽，每組首、次名直接進身2014年巴西世界盃決賽周，兩支小組第3名踢主客兩回合附加賽，勝出球隊再與大洋洲區冠軍，爭逐一個決賽周出線席位。