捧小保加W夠本夠「利」

猪拉多纳

歐國盃踢到如火如荼，另邊廂嘅自由盃亦都嚟到4強階段，小保加聽朝就會喺主場恭候智利大學進行首回合賽事。呢支阿根廷班霸啱啱喺聯賽失威，成班主力有假都唔放特登返球會練波，擺明想做番齣好戲，1.72倍主勝信得過喎！（有線61及201周五早上7:15直播）

小保加啱啱禮拜日喺阿甲出擊，開波唔夠5分鐘已經打多個，點知最後只能夠同班菲特各一言和，班球迷唔躁就假咯！為咗備戰今場自由盃，教練法斯安尼翌日就馬上操練，本來畀對班菲特有份落場嘅球員放假，估唔到班正選通通返晒去仲操得特別積極，擺明想搵智利大學祭旗出番啖氣。
智利大學隊長或缺陣

阿根廷國家隊門將奧利安同守將基文迪洛迪古斯已經歸隊，不過後者背部有傷，相信文奴會頂佢個位，影響照計唔大。最重要係老將舒希艾維表態想續多年約踢到收山，搞到班「藍黃」手足鬼咁雀躍，士氣相當唔錯。

對家智利大學從未入過自由盃決賽，能唔能夠打破宿命真係要考考教練森柏奧利嘅功力。賽前智利《水星報》就話，隊長荷西羅渣士左腳腿筋撕裂，好大機會缺陣，冇咗呢位後防大將，睇怕都好難頂得住由列基美領軍嘅小保加。