德國最有冠軍相

猪拉多纳

歐國盃參賽球隊實力平均，今屆除兩個主辦國外，其餘球隊水平都幾接近，見唔到有一兩隊特別標青彈出來，即使德國同西班牙牌面睇落較高，但其他對手踢落亦唔係完全冇得打。歐國盃搞得有聲有色，直頭拍得住世盃，最難得係賽事組織好，透明度好高，公平又公正，無論莊家同菠菜人士都有信心，難怪踢到八強階段生意已經好到不得了。

講番八強賽事，德國對希臘初盤讓到球半，賽前出面啲風一路都係吹大盤同上盤，不過一班大戶最初扒逆水要下盤同細盤，但去到走地階段愈睇愈唔對路，最後都係買番轉頭捧德國同大盤。呢班大戶勝在搵到個靚位入貨，埋單計數仲有得贏水位，條數確係計得準。肥叔認為德國現時不論體能同團隊合作都好，整體睇落甚至喺西班牙之上，真係愈來愈有冠軍相。
英格蘭有運秤先

講番今夜矚目好戲，英格蘭同意大利真係正宗五五波，兩班波級數非常接近，莊家開緊平手盤，已經反映雙方勝出機會完全均等。英軍水位低少少，初盤95水畀人打到落9水，暫時稍為被睇高些少。如果單論狀態，肥叔都係覺得英格蘭好啲，而且佢哋今屆冇乜壓力，依家打順咗條氣，加上隊波明顯行緊運，結合咁多利好因素，平手盤當然可以秤先。
肥叔心水

英格蘭 平手盤

猪拉多纳