美聯盃專家西雅圖闖關

猪拉多纳

講到盃賽專家，英格蘭就首推利物浦，至於美國就肯定非西雅圖海灣者莫屬，呢隊波自加入美職以來，一直以美聯盃為首要目標，佢哋今屆就向4連霸進軍，聽朝喺4強戰於中立場塔克維拉迎戰美國芝華士，1.55倍主W屬過關首選。

（開賽時間：周四早上10:00）

其實爭美聯盃都算係低成本、高回報，事關只需要贏5場就足以捧盃，仲可以攞埋來年中北美洲冠軍盃入場券，不過唔係隊隊波有心搶盃，唯獨連續3屆都封王嘅西雅圖誠意十足，今屆場場畀足面，對住二打六球隊都遣強陣大炒對手，今鋪對住對上3圈都只係淘汰次級聯賽球隊嘅芝華士，應可順利闖入決賽。
博過關要埋費城聯W

另一場美聯盃4強戰由費城聯主場迎戰肯薩斯體育會，想博冷的話，不妨直取費城聯2.7倍主W，話晒佢哋近期火力驚人，近5戰共入15球，早前喺聯賽亦曾大炒肯薩斯4:0，今次不妨追多鋪。（開賽時間：周四早上7:30）
美職聯賽盃賽制：

今輪為4強戰，以一場過分勝負，若法定時間內打成平手，則需加時作賽，再和就互射12碼決勝。

足球重心：西雅圖海灣者（勝）、費城聯（勝）

馬膽推介：7場(3)旋風魅力

級數同今場熱門「善寶」差唔多，上仗形勢略為被動先至未能後發先至，今仗「善寶」排內檔反而未必啱追，「旋風魅力」有權偷雞。