奧運男足勁爆上畫

猪拉多纳

倫敦奧運男足星級戰將強勢登場！倫敦奧運仲未展開，男子足球搶閘開波，16國精英分成4組角逐，首輪8場分組賽會喺今晚踢晒。雖然英國冇召入巨星碧咸，但今屆賽事仍然星光燦爛，大熱門巴西擁有尼馬及侯克等超級球星，另一奪金要角西班牙則由三位歐國盃冠軍隊成員桑馬達、佐迪艾巴及查維馬天尼斯擔大旗，南美勁旅就有屈機射手蘇亞雷斯同卡雲尼壓陣，日本則有超級中場宇佐美貴史領軍，加埋威爾斯老將傑斯代表英國首次喺國際舞台處子登場，咁多星，你唔係唔睇啊？
西班牙日本搓多過射

世界足球霸者西班牙男奧足今屆被編入D組，首輪會在蘇格蘭格拉斯哥面對日本男奧足，今場屬歐亞技術對決，兩隊都鍾意控球在腳，擅長搓波，踢法悅目。西班牙召入三個歐國盃冠軍隊成員，級數高，但日本亦有多位外流球員助陣。兩隊高手過招，入波唔多，捧細！（有線61及201台周四晚9時45分直播）

西班牙近年大踢控制型足球，大、小國腳都以相同打法殺敵，成功稱霸世界。西班牙男奧足今次召入三個歐國盃戰將，包括左閘佐迪艾巴、中場查維馬天尼斯及進攻中場桑馬達，加上蒙尼恩及阿祖安盧比斯等優質小將，實力強勁，早被視為爭金熱門。不過，呢隊西班牙始終冇大國腳咁惡，首度出擊隨時長期喺外圍搓搓搓，可勝不穩，熱W忌捧！
東瀛「德甲兵」有質素

日本愈來愈多球星出國搵食，今次男奧足大軍有唔少德甲兵，包括酒井宏樹、清武弘嗣及大津祐樹等，論然名氣當然唔及西班牙眾星，但勝在實而不華。