美女起鑊炒「西蘭」花

猪拉多纳

由小妹偶像蘇露領軍嘅美國以完美姿態進身8強，今晚將會同新西蘭死過！不過小妹完全唔擔心火力最強嘅「阿美利堅」會出事，仲睇好佢哋炒起「西蘭花」強勢入4強，不過「讓主」嫌太熱，不如捧1.52倍「入球大」算啦！（有線18、63及203台周五晚9:30直播）
3場入8球攻擊力最猛

唔好睇女子足球愈嚟愈受注目，原來由1921年起打後嘅50年間，呢項運動喺英國曾經被禁，理由係呢項運動「唔適合女性」喎！好彩依家女足嘅水準同可觀性都大大提升，睇下美國女足就知，雲芭芝就算已經年屆32仍然爆得扭得又射得，3場入3球嘅佢拍住萊德同雅歷絲摩根，幫美國喺3場分組賽攻入8球，今場要數多幾球晉級，真係冇乜難度。

「美女」上場對北韓煲出魚生粥，擁躉多少會有啲失望，不過殺到入淘汰賽階段，小妹相信佢哋嘅心態會唔同啲。今仗對手新西蘭分組賽3場得1勝2負，實力有限，難阻美國繼續爭取衞冕喇。