森巴兵搶首金 圍剿墨西哥

猪拉多纳

「小森巴兵」能否大熱奪得該國男奧足第一金，今晚自有分曉！喺今屆男奧足所向披靡嘅巴西會同墨西哥合演決賽，就算「烏鴉口」比利貼巴西奪金，小妹都相信尼馬有力率領火力強大的巴西「破咒」，一於直取2.2倍「讓球主勝」，博巴西完美奪冠啦！（有線18、63及203周六晚10:00直播）

講真，巴西喺今屆奧運男足決賽之路贏5場入15球，火力冠絕群雄，被睇好可以首奪奧運金牌都係理所當然，不過「世紀明燈」比利突然走出嚟講句：「希望巴西可以拎到史上首面男奧足金牌啦！」小妹相信一眾森巴小將聽完之後，應該會即刻嚇到面容扭曲！
杜斯山度士打柴唔出得

好彩，對家墨西哥喺賽前傳來壞消息，杜斯山度士因為肌肉拉傷缺操，今場好大機會唔出得，墨西哥冇咗呢位5場賽事交出3個入球及3次助攻嘅猛將，對後防表現一般嘅巴西嚟講，當然係大好消息！

何況，「新球王」尼馬喺今屆奧運男足表現愈嚟愈成熟，由第一場畀人狠批佢自私，到之後講到明齋畀助攻益李安度達美奧入波，真係令小妹刮目相看o架！事實上，呢班小將亦重現咗「森巴足球」崇尚進攻嘅風格，佢哋至今5場全勝兼場場入3粒，加上5場入6球嘅李安度達美奧狀態Top弗，今場要大炒墨西哥奪首金，Easy Job！
賽制：

決賽以一場過分勝負，若法定時間內打成平手，需加時作賽，再和則互射12碼決勝。
近5屆決賽戰果

2008年

阿根廷 1:0 尼日利亞

2004年

阿根廷 1:0 巴拉圭

2000年

喀麥隆 2:2 西班牙

加時打和2:2，互射12碼喀麥隆勝5:3

1996年

尼日利亞 3:2 阿根廷

1992年

西班牙 3:2 波蘭