修咸頓擺唔到幾耐

猪拉多纳

各位讀者大家好，我今年會加入「球彩全女打」大家庭，同各位一齊睇好波！英超尋晚已經開鑼，但曼巿雙雄今明兩晚先登場，相信大家都好期待尹佩斯聽晚深夜首次替曼聯上陣，但今晚曼城對住大家久違嘅修咸頓，同樣令球迷有興趣捧場！

（有線300及200台周日晚11時直播）

提起修咸頓一定諗起傳奇球星拿鐵斯，呢間老牌球會不經不覺已闊別英超7年，呢7年試過降落英甲、又有財政問題被扣分，如今球隊重返英超，可以話係苦盡甘來，亦係球迷意料之外。

不過，修咸頓呢支南部球會升班後未能簽入星級球員，主要轉會來自般尼嘅射手積洛迪古斯同水晶宮後防尼達利基尼，計水準都只屬一般，同曼城球員相差好遠。雖然修咸頓貴為上季英冠入球最多嘅球會，但開鑼戰作客曼城就認真無運行，相信領隊艾堅斯心中有數唔會有分落袋。
預咗畀曼城炒

曼城今個暑假並無簽入太多球員，新加盟嘅只有中場魯迪維爾，但以球隊現時人腳，要贏修咸頓仍然綽綽有餘，上星期亦以幾球靚波搞掂車路士捧社區盾。曼城狀態一早操起晒，季初成績應該唔會有問題，門將赫特雖未能趕及傷愈復出，但預測戰情會一如上季對當時嘅升班馬史雲斯一樣，修咸頓靠士氣踢咗頭廿分鐘好波，之後就如一個漏氣皮球任由曼城魚肉，大家可以諗吓啲大炒波膽呀！