基達菲唔阻皇馬翻身

猪拉多纳

上季聯賽盟主皇家馬德里，開咧至今接連受挫，今晚作客同市兄弟基達菲，係人都知兩間球會關係密切，加上皇馬急需搶分重上正軌，唔會留手，基達菲隨時讓路畀「大佬」，就算主場受讓都信唔過，呢場皇馬「讓球客勝」捧得過。（now 632周一凌晨3時直播）

作為馬德里市第三球會，基達菲唔似馬體會般同皇馬有咁大牙齒印，相反該隊與「銀河艦隊」情如手足，近幾年更成為皇馬嘅「練兵基地」，不斷將一些新仔借畀基達菲培訓，好似米基爾托利斯、柏度李安，甚至現任青年軍教頭、昔日名宿米高，亦曾經教過基達菲，可見兩軍關係非淺。

特別係皇馬今季開得好唔順，不但首輪被華倫西亞逼和，上周中喺西超盃又畀宿敵巴塞反勝，難免會影響陣內信心，極需要贏一場具說力嘅勝仗振奮軍心，遇上「細佬」基達菲，仲唔數得就數咩！
柏度李安不能倒戈皇馬

事實上，皇馬除了中堅比比因傷缺陣，其餘戰將都整裝待發，特別係極度好勝嘅王牌C朗，唔會畀自己一衰再衰。撇除基達菲會讓路嘅可能，該隊今季仲賣走艾里斯文迪、丹尼爾戴亞斯及卡斯基路等主力，實力受削，而進攻發電機柏度李安因借將身份，今仗不能倒戈披甲，點夠皇馬砌呀？斯維相信皇馬知恥近乎勇嘅決心，「讓球客勝」不容錯過。至於特別項目，C朗入波有2.1倍，唔大貪都玩得過，抵過2.75倍嘅首球。