曼Q煞科激戰今晚重演

猪拉多纳

相信好多球迷仲對上季英超壓軸戲記憶猶新，曼城對昆士柏流浪一戰，「藍月亮」喺最後關頭連入兩球反敗為勝捧盃，兩隊埋身肉搏有前冇後，今晚兩軍再遇，球迷等住再睇入球騷啦！

講開上季嗰場壓軸戲，唔單止過程峰迴路轉，其實場外仲有個故事可以同大家分享下嘅，同上個禮拜選美全民投票流產相似，呢個古仔又係關於伺服器死火嘅！

話說英超煞科當晚，新加坡嘅電視台直播晒10場波，由於收視率爆燈，伺服器竟然負荷唔到，直播過程中多次出現訊號中斷，到完場前5分鐘仲冇晒畫面，當時曼城落後緊1:2，到有番畫面嗰陣已經完場，球迷們見到曼城比數係3:2，當堂媽聲四起，當地電視隨即道歉之餘，仲減收訂戶費用以示歉意。當然，球迷根本唔志在雞碎咁多錢，最緊要有好波睇，今晚「曼Q」再遇，一於入多幾粒，當係補償畀獅城Fans啦！