紅魔「大」騷助興

猪拉多纳

曼聯今輪作客修咸頓，「紅魔鬼」老帥費格遜第1000次領軍出戰聯賽，眾星實喺呢個極具紀念價值嘅日子搏盡助興，喺朗尼缺陣情況下，兩個新兵尹佩斯同香川真司繼續擔大旗，必定全力爭取士哥。不過，修咸頓開咧戰對曼城𡁻入兩粒，並非全無還擊之力，今場捧大最好！

（有線300及200台周日晚11時直播）

曼聯主帥費格遜自86年起率領球隊征戰逾廿五載，今仗迎來領軍另一個里程碑，第1000戰賽前仲係勁好火氣，狂插英格蘭足總洩露快翼艾舒利楊格消息，「紅魔鬼」仲有主力射手朗尼受傷，但兩大優質新兵尹佩斯同香川真司上場齊齊開齋，足以取代朗尼擔起進攻重責。大軍防線續有里奧費迪南及基斯史摩寧養傷，莊尼伊雲斯復操冇耐未夠狀態，隨時又要搵卡域克串演中堅，後防唔算穩陣。
修咸頓空襲曼聯

修咸頓喺轉會窗結束前簽下烏拉圭國腳加斯頓拉美利斯，呢個進攻中場甚具級數，但今場未必會正選登場。不過，大軍本身有唔少進攻好手，主力前鋒列基林拔開咧戰對曼城取得士哥，已見功架，中場拉爾拉拿賽前更向傳媒透露球隊勤練死球攻勢，希望針對曼聯門將迪基亞不擅應付高空波弱點，絕對有本錢取得士哥。

名牌球隊曼聯出親場都被捧成熱門，今場話就話係老費第1000場聯賽，但客Ｗ不足1.5倍，實在唔多抵玩，考慮到「紅魔鬼」現時攻強守弱，捧入球大更佳。