日本主場歎慣細界

猪拉多纳

阿King今次想同大家睇場國際熱身賽，亞洲名牌球隊日本主場對阿聯酋，日軍要備戰下周世界盃外圍賽，教頭沙哲朗尼召入多位外流球員，當中包括曼聯球星香川真司及莫斯科中央陸軍左腳王本田圭佑，但大軍於熱身賽好興歎慢板，今次隨時小勝算數，熱W唔抵玩，改捧入球細。

（周四晚6時20分開賽）

日本近年愈來愈多球員出國搵食，水平不斷提高，班波夾到好熟，依家控球能力好強，直頭踢到成隊西班牙咁，確係非常犀利，喺亞洲比賽完全超班。日軍中前場擁有香川真司，成功連繫攻守，本田圭佑、岡崎慎司及長谷部誠等中場前球員波底好，預計球隊可以控制戰局，贏面的確係比較高。

不過，日本於主場出戰向來有個弊病，就係傾向慢熱，呢個問題熱身賽特別明顯，佢哋往往會長時間控球在腳，但攻勢唔會好到肉，上次對住委內瑞拉都係打成1比1。

今場對手換咗係阿聯酋，相信戰況都係相近，主勝熱得嚟唔算穩陣，「讓球主勝」更加大風險，預期兩隊入波唔多，入球細值得留意。
富明尼斯唔怕「度士」

同日仲有兩場巴甲，富明尼斯主場對山度士，論名氣山度士仲大，但富明尼斯今季水準穩定，主場發揮對辦，呢隻主W仍然可以信賴。

另一場彭美拉斯主場對利斯菲體育會，兩隊水鬥水，根本係五五波，彭美拉斯態沉讓唔起對手，要「讓球客勝」！