孖堡大戰禾夫斯堡討債

猪拉多纳

德甲獨腳戲，零分部隊奧格斯堡主場鬥禾夫斯堡，奧格斯堡係今季德甲演出最曳球隊，今仗陣容又嚴重不整，平手盤我捧質素高幾皮嘅客軍禾夫斯堡。

（有線64、204台周六凌晨2時30分直播）

奧格斯堡係德甲雞尾班，上季長期處於榜尾位置，全靠今仗對手禾夫斯堡伸出援手，借出南韓進攻中場具滋哲，季尾發力至逃出生天，具滋哲成為佢哋護級英雄，不過今季限於財力冇本錢擴軍，主力細貝萌又借用期滿歸還利華古遜，首仗就主場吞最窮升班球隊杜塞爾多夫兩蛋，上仗作客亦大敗於史浩克04腳下，目前仍然未有分落袋，唯一入球係上仗落後0比3時由奧爾夏破蛋，但其實亦越位在先，只係球旁證睇唔到。
奧格斯堡「謝恩」

奧格斯堡今仗更加頭痕，一直係防線支柱嘅主力門將贊斯手指受傷無緣披甲，具滋哲同鋒將梅蘇拿亦因傷缺陣，連後防大將施巴斯坦蘭甘亦有傷上陣成疑，陣容弱上加弱。

禾夫斯堡喺今夏豪花超過三千萬歐元擴軍，不過表現同成績都未如理想，首仗戲劇性贏史特加相當有運，上仗主場竟然慘吞漢諾威四蛋，不過賽後巴西新援拿杜解釋，話因為好多新加盟球員未適應教練馬加夫嘅超高強度操練，比賽時回唔到氣腳軟，但佢認為「辣操」對球隊長線有好處。

事實上，禾夫斯堡一直係奧格斯堡嘅恩公，除具滋哲外，門將贊斯亦由禾堡來投，禾堡上季亦曾借出小將哥治亞畀佢哋，今季仲借埋法國前鋒施奧添！禾堡上仗大敗後急於交代，奧格斯堡係時候還債啦！