安國倫開心陶寶

猪拉多纳

安國倫周三晚因為ＢＢ女抱恙，特登申請退下火線陪愛妻湊女，呢位廿四孝老竇尋日恢復披甲，愛心滿瀉即刻有回報，響頭場賽事策騎沈集成旗下「開心陶寶」一放到底贏馬，今季正式開齋。
       
開心陶寶轉沈廐一出即勝。
潘頓揀錯馬「笑」唔出

呢場賽前話題集中響潘頓四揀一，結果揀騎「開心歡笑」就被追捧成為今仗大熱，可惜表現就無段好睇，反而「開心陶寶」呢匹棄騎，無端端益咗安國倫，冷手執個熱煎堆，沈集成賽後亦話潘頓走寶。
       
安國倫

對於「開心陶寶」嘅評價，成哥就解釋話初接手時候，就發現呢匹馬有中度胃潰瘍，經過悉心調教下，馬匹胃納轉好馬身亦轉壯，今場一出即勝，賽果一啲都唔意外，而佢認為轉戰跑馬地，「開心陶寶」可能更具威力。