拉科西維爾鬥磨「半場和」

猪拉多纳

今晚九場波，焦點無疑係西甲獨腳戲拉科魯尼亞主場對西維爾，雖然兩隊今季表現唔曳，但衰在守強攻弱，未必會一開波就搶韁進攻，呢場個「半場和」值得一試。（周二凌晨3時30分開賽）

拉科升班後憑穩固防守，總算站穩陣腳，上仗仲有葡國小將尼爾遜米基爾開齋，但呢隊波開賽初段比較穩陣，主場出戰都係咁踢，過去四仗，拉科有三仗同對手未分勝負，加上仍重用老將中鋒里基，證明該隊冇強攻本錢。西維爾上仗勇挫皇馬一鳴驚人，但比賽過程所見，西軍唔輸非常好彩，預計教頭米高今仗都係以穩行先，該隊近兩作客亦於半場打和，既然兩軍擅於初段鬥磨，不如追捧「半場和」。
士砵亭借基維辛迪反彈

葡超名牌士砵亭近況麻麻，不過射手雲禾夫斯雲高已重拾射門鞋，今仗主場對基維辛迪應可大勝一場，「讓球主勝」值博。（有線155台周二凌晨3時15分直播）至於英冠黑池一向火力猛，前維拉射手迪爾科尼素着晒火，上仗更梅開二度，配合名宿恩斯囝囝湯馬士恩斯，主場迎戰哈特斯菲爾德照攻可也，大盤好路。