曼聯熱刺大火併

猪拉多纳

「紅魔鬼」由1989年起喺奧脫福從未輸過畀熱刺，近9次主場更加係贏晒，馬會開半一盤好正路！熱刺為破宿命實會搏命入波，買注入球大似乎更穩妥！

（有線300及200台周日凌晨零時30分直播）

朗尼同費查近日復出，無論對球隊或球迷講都係好消息，朗尼大腿畀人劏開，抖咗一個月之後喺周中聯賽盃復出，依家前線上有佢，同埋已經有五球在手嘅尹佩斯，重有「小豌豆」、韋碧克等畀費Sir調動，今場入波唔成問題。

曼聯過去五場英超入到十二球，火力比上季有增無減。不過，最擔心重係條後防，最可靠嘅尼曼查維迪受傷有排抖，中堅位置預計會由里奧費迪南拍住莊尼伊雲斯，呢場只要走漏對方嘅迪科爾一次就足以出事！閘位嘅艾拉及拉菲爾達施華相信亦會受到嚴峻考驗，因為對手善於喺邊路發難，所以「紅魔」後防穩定性係今場勝負關鍵！
熱刺側擊有睇頭

熱刺放走中場兩個核心雲達華治及莫迪歷後，未致潰不成軍，五場聯賽兩勝兩和一負，成績尚可！新加盟嘅美國中場丹普西之前効力其他球會時，近十次對曼聯都冇波入，睇吓保亞斯可唔可以幫佢發揮潛能啦！上季未能穩奪正選嘅迪科爾今季得到保亞斯重用，頭五輪都以正選出場，依家有四球在手，佢無論喺聯賽或者英格蘭國家隊表現都冇令人失望，呢場要注意下佢喇！

我之前已經提過好欣賞熱刺喺邊路出擊，加里夫巴利同艾朗連儂一左一右，右閘基爾獲加亦可以疊瓦上埋嚟，咁強嘅側擊，大可趁「紅魔鬼」後防唔齊腳博入波。呢場唔好諗咁多，一於買「大」一齊收錢賞月啦！
Wendy推介：曼聯對熱刺 入球：大