曼聯熱刺射手大鬥法

猪拉多纳

今晚中秋迎月夜，英超好戲連場。小弟依家身在英國，曼聯主場迎戰熱刺場波，屆時亦會入奧脫福球場親身支持，感受吓「大」戰氣氛兼睇番場入球騷。

（有線200及300、廣東體育周日凌晨0:30直播）

小弟入場前當然都不忘同時玩吓考眼光遊戲，有助現場投入㗎！不過「紅魔鬼」傷兵滿營，面對回勇嘅熱刺未必贏得到，但係兩隊嘅王牌前鋒尹佩斯同迪科爾都「弗」到漏油，依家分別排喺射手榜頭兩席，睇吓佢哋今晚趁住雙方後防唔多穩陣，數多幾粒都唔出奇！
朗尼復出火力大增

曼聯自英超開鑼戰輸波後，即刻喺聯賽連贏4場，但講真過程就冇乜說服力，對修咸頓同富咸都失兩球，上星期更畀利物浦比下去，條防線真係麻麻哋。賽前仲傳出中堅尼曼查維迪再受傷要唞2個月，後防人腳更加捉襟見肘。不過曼聯勝在攻擊力爆燈，尹佩斯唔經唔覺已經有5個「士哥」排射手榜榜首，加埋朗尼又復出，入球能力肯定有增冇減啦！

至於熱刺就有個迪科爾單天保至尊，唔使畀主隊個尹佩斯威晒！呢位英格蘭邊緣國腳喺季前幾乎畀保亞斯賣走，好在佢大打爭氣波，依家亦喺英超拎到4個入波，佢同艾朗連儂、加里夫巴利組成嘅超高速進攻線，真係唔係咁多球隊頂得住o架！何況曼聯左閘艾拉出晒名唔識防守，右閘新仔維米吉又輸經驗，隨時畀熱刺嘅快速反擊打殘。以熱刺近期逐漸上力，今晚絕對有能力同曼聯駁火！
頂占筍盤：曼聯（入球大）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「超級星期六」開放時間：周六晚9:00至周日凌晨2:30