巴塞後防穿窿隨時歸西

猪拉多纳

巴塞究竟幾時會失分？今晚佢哋將於西甲作客西維爾（右圖左），主隊開季狀態勁弗，仲喺自己地頭贏過皇馬，對住巴塞未必輸硬，反而「地上最強」條防線天殘地缺唔多靠得住，小妹覺得西維爾有權搶分而回，一於捧2.6倍「讓主」啦！

（now632台周日凌晨4:00直播）
布斯基斯腰痛難鬥西維爾

單睇戰績，巴塞5場全勝確係勁，不過佢哋條防線冇咗佩奧爾、碧基同艾迪安奴後，表現一直震騰騰。點知今場又有壞消息，正選防中布斯基斯近日腰痛，雖然尋日同埋恩尼斯達一齊復操，但就未必趕得切上陣，即係話巴塞好大機會要再搵馬斯真蘭奴同桑治串演中堅！就算前面有美斯入波，後面成個冇掩雞籠咁隨時失番幾粒，3分未必落得晒袋。

西維爾唔止5場都未輸過，仲喺主場贏過皇馬，可以話係今季嘅代表作！佢哋只要打番擅長嘅高速反擊，靠捷西斯拿華斯喺邊線發難，配合把握力超強嘅尼格度，面對巴塞條甩皮甩骨嘅防線偷襲得手又有乜出奇？小妹就睇好西維爾做多次「巨人殺手」喇！