神奇西布朗繼續發「維」

猪拉多纳

英超每季梗有一支神奇球隊喺季初彈出，呢個角色今季好大機會就由西布朗擔任。西布朗雖然冇乜星味，但勝在戰鬥力十足，盧卡古同沙恩朗呢對箭頭火花四濺，今晚佢哋作客維拉，絕對有機會繼續發威，西布朗1.53倍「讓球客勝」咪嫌熱！（有線200及300、廣東體育周日晚11:00直播）
維拉年輕防線多甩漏

上季僅僅護級成功嘅維拉，雖然剛啱喺上周中嘅聯賽盃淘汰曼城，但佢哋喺英超演出似乎未見起色，開季5戰1勝1和3負排14位，表現仍難令球迷安心。尤其係由馬菲路頓、施亞蘭奇勒同列查積等新人組成嘅防線亦好唔穩定，英超場均失1.8球，加埋班倫、賓迪基等全部都係廿歲出頭，只係靠艾利蘭同戴倫賓特帶領，想有好成績都幾難啦！

相比之下，西布朗嘅表現就帶畀球迷無限驚喜，尤其係上季喺利物浦擔任杜格利殊副手嘅奇勒，6月先代替鶴臣接掌西布朗帥印，即令班波表現脫胎換骨。更重要係奇勒向車路士借用「新杜奧巴」盧卡古亦非常啱使，配合埋沙恩朗，呢對進攻組合喺前線衝得、撞得、扭得又射得，隨時為維拉後防帶嚟極大困擾。

頂占筍盤：西布朗（讓球客勝）