風林衝冠贏比你睇

猪拉多纳

日乙踢剩五輪，「一哥」甲府風林拋離次席湘南比馬十三分，今周兩隊合演榜首對決，風林只要喺主場再添一分即可提前升班，有朋友擔心佢哋揸流攤和波夠數，不過，風林挾聯賽十九場不敗強勢出擊，射手達維又弗到漏油，對住啱啱喺天皇盃搏殘嘅比馬做乜要求和？捧主勝！

（周日下午2時開賽）

日乙升班席位爭持激烈，除甲府風林彈出外，二至七位球隊差距僅得四分，仲係爭崩頭。「一哥」風林踏入下半季唔識寫個「輸」字，對上十九場聯賽保持不敗，冇計啦，佢哋個超級射手達維入球停不了，現時喺聯賽已經轟入廿九粒，當中有唔少係關鍵士哥，家陣距離完成升班大業只差一步，話就話拎多1分就可肯定升班，但「達哥」同班隊友踢到順晒，主場出戰點會勒住求和吖！
比馬天皇盃搏殘

去到爭取升班關鍵時刻，湘南比馬突然腳軟，近四場聯賽一和三負得一分，加埋失咗八球，後防踢到失晒魂，曳到冇朋友！比馬剛過去周中仲要出戰天皇盃，作客日職實力分子柏雷素爾頂到尾段僅敗，班兵都搏得幾盡，去到季尾階段未必回得切氣。論人腳兩隊差距唔算好大，但計狀態同信心風林明顯高一截，預期風林可以贏波提前獲升班，捧主勝！
日乙推介

北九州向日葵 讓球客勝

甲府風林 勝

FC岐阜 讓球主勝