美斯弗爆阿根廷玩殘智利

猪拉多纳

世盃南美洲區外圍賽畀美斯玩晒，智利聽朝喺主場對阿根廷，唔似偷到雞。最近輸到甩轆嘅智利今場有3個主力同時停賽，相反，美斯喺阿根廷國家隊大爆發，連教頭沙貝拉都要聽佢支笛，做得大佬梗係要繼續騷哥厘啦！

（中央5台周三早上8:05直播）
智利3星齊坐波監

原本智利已經有射手漢拔圖蘇亞素同中場佐治華迪維亞因傷落選，結果日前以1:3慘負厄瓜多爾之餘，中場維達爾、後衞柏保路干查拉斯同奧斯華度干沙利斯今場更齊齊坐波監，邊有運行？要知道智利連輸3場，期間每場失3球，今場對住榜首嘅阿根廷，睇怕半場都捱唔到。

阿根廷剛啱以3:0摧毀烏拉圭，新球王美斯梅開二度，前鋒阿古路都有波入，今戰賽前射手希古恩又好番晒，就算後衞馬高斯盧祖傷出都唔驚。最近美斯更自爆，主動要求教頭沙貝拉安排阿古路、希古恩同迪馬利亞同時打正選，因為佢鍾意前線多啲人合作，近排佢心情靚爆不斷有波入，相信同佢真正成為國家隊大佬，可以喺最習慣嘅環境比賽有關。既然有美斯、易開W，今場當然係撐阿根廷1.85倍客勝！
賽制

9支球隊進行雙循環分組賽，前4名直接出線決賽周，第5名與亞洲區第5圈勝出球隊踢兩回合附加賽，決定出線席位。