馬略卡作客發維

猪拉多纳

今晚西甲獨腳戲，由近況回落嘅西維爾主場迎戰馬略卡，前者連輸兩場後成隊變得散散地，失去之前勇挫皇馬嘅銳氣，而且幾名主力如杜查奧斯基、波迪亞等，今仗因傷停而無緣披甲，未必咬得入防守穩健嘅馬略卡，「讓球客勝」捧得過。（now 632周二凌晨3時30分直播）

西維爾季初一度回勇，主場擊敗皇馬一役堪稱代表作，其中德國中場杜查奧斯基演出sharp醒，無論墮後幫手派牌，還是後上入楔埋門，都重現昔日在漢堡嘅風采，成為球隊進攻發電機。可惜，自呢位「矮腳虎」受傷後，西維爾表現極速回落，加上對巴塞領先兩球嘅情況下，最終畀對手反勝，成隊波好似畀人打謝晒，之前嘅士氣、信心全部蕩然無存。
西維爾4主力傷停

雖然有兩周國際賽期過冷河，但西維爾嘅傷兵如杜查奧斯基同柏洛迪仍未康復，今仗仲有中堅波迪亞同防中加利美度停賽，幾大主力唔出得，教練米高都大嘆無奈。相反，馬略卡剛向巴塞借得年輕中堅方達斯，令防線更加穩固，而該隊前鋒希密特唔單止於聯賽有五個士哥，近兩仗為以色列國家隊出戰轟入五粒，狀態托弗，有力帶領客軍全身而退，馬略卡受讓，「讓球客勝」屬不二之選。