阿葉冇後勁難讓打比郡

猪拉多纳

今晚除咗歐聯外，英冠方面亦大開快車，阿King誓要追住葉士域治嚟反！呢隊衰波慣咗有頭威、冇尾陣，近四場賽事佢哋都首先入波領先半場，但竟然全部贏唔到，近兩場仲輸埋，反映呢班波後勁曳絕，今場讓唔起「綿羊」打比郡，揀「讓球客勝」！

葉士域治連續兩場反勝為敗，後防責無旁貸，呢班波本季十一場聯賽，只得一場保持清白之身；其中七場失兩粒或以上，真係曳到得人驚。上場作客侯城，佢哋到補時階段輸埋，對士氣打擊非常大；依家仲要開快車，班波道氣都未順番咁快又要落場，面對狀態十足嘅打比郡，主場都讓唔起。

（周三凌晨2時45分開賽）
李城死火捱「細」界

另一場李斯特城主場對白禮頓，「狐狸」於五連勝後，上場完場前僅僅逼和伯明翰，氣勢上有所減弱；白禮頓近期前鋒死晒火，但就勝在防守硬淨，捧細。最後預埋諾定咸森林，佢哋好波中場安祖列特最近踢到曉飛，球隊亦氣勢如虹，今次作客連續兩場冇波入嘅黑池，森林「讓球客勝」可取。