聖日耳門得個名冇料到

猪拉多纳

今晚繼續有歐聯賽事，A組法甲富豪球隊巴黎聖日耳門雷聲大雨點小，陣中球星如雲，但表現頗令人失望，甚有曼城上屆歐聯分組出局嘅影子。今仗作客克羅地亞薩格勒布戴拿模，要讓一球，明顯受名牌效應影響而被高估，寧願捧薩格勒布戴拿模下盤。

（周四凌晨2時45分開賽）
薩格勒布隨時有驚喜

聖日耳門今季投放大量資金收購伊巴謙莫域等球星，但睇番成績並冇明顯進步，聯賽勝出率僅過一半，以佢哋人腳而言，可以話係唔合格。歐聯水平比法甲更高，聖日耳門前景唔太樂觀，上輪作客輸畀波圖，顯示佢哋仍然需要交學費。薩格勒布戴拿模兩戰皆敗，餘下賽事更加不容有失，背水一戰之下，可以大大增強鬥志，加上有主場之利，隨時會有驚喜表現。

B組阿仙奴喺英超冇得爭，應會更加睇重歐聯，佢哋首兩輪分組賽都有上乘演出，主場贏到史浩克04。C組就比較睇好馬拉加，呢隊新興勢力有鬥心，開季後踢得好順，遇上陷入嚴重低潮嘅AC米蘭，可望再下一城。D組皇馬過去作客德國成績唔好，而且已有六分在手，今仗唔輸都冇問題，爭勝意欲成疑，讓多蒙特平半寧揀下盤。