皇蘇作客全敗 華拉度列開餐

猪拉多纳

今輪西甲壓軸好戲，華拉度列主場迎戰皇家蘇斯達，皇蘇係出晒名嘅地頭蟲，但上周補時階段被馬體會打破今季主場不敗金身，士氣受挫，加上作客全敗嘅曳績，呢場都係冇運行，華拉度列小讓平半，一於捧上盤。

（now 632周二凌晨4時30分直播）

作為升班球隊，經過季初一鼓作氣後，華拉度列近期難免出現起伏，近六聯賽僅得一勝。其實睇番當中嘅比賽過程，華拉度列演出唔曳，上仗作客馬拉加，如果唔係前曼聯球員文路祖唔生性臨尾領紅，搞到打少個，都唔會被對手反勝。華軍自中場奧斯卡干沙里斯復出後，連帶令前鋒貝爾奴亦重拾射門鞋，今仗雖有文路祖停賽，但對攻力影響唔大。
客軍三主力缺陣難爆冷

皇家蘇斯達一向靠主場搵食，頭三場喺自己地頭嘅聯賽贏晒，上仗被馬體會神級射手法卡奧補時階段絕殺收死，今季主場不敗之身被破，嚴重打擊球員嘅士氣，況且該隊作客例必腳軟，今季四場作客全部輸晒，仲有蘇魯圖沙、艾路斯當度及首席門將哥迪奧巴禾等主力因傷倦勤，今仗唔係華軍對手，上盤值得捧場。