多蒙特讓得起阿倫

猪拉多纳

今晚德國盃第二圈賽事，多蒙特迎嚟一星期內第3場比賽，作客乙組球隊阿倫。「蜜蜂兵團」已經重返勝軌，上周末就算落雪搞到個場鬼咁跣都阻唔到佢哋入波，信心狀態返晒黎，今晚對住次一級別球隊，一球絕對讓得起，1.63倍「讓球客勝」捧得過！

（無綫翡翠台周三凌晨03:30直播）
阿倫近3場未贏過

上周末多蒙特對弗賴堡嘅比賽因為落雪搞到個場鬼咁跣，影響晒「蜜蜂軍」行雲流水嘅短傳小組滲透，好彩最後佢哋都憑住蘇保迪接應死球頭槌打開紀錄，同馬里奧葛斯埋齋贏2:0。雖然賽後教練高普就話希望今晚對阿倫嘅比賽唔會再落雪，不過佢哋進攻瓣數咁多，又個個都識入波，就算再落雪都難唔到佢哋啦，贏兩球等閒事！

阿倫教練夏辛侯頓賽前死撐自己隊波學嘢快，唔知極限喺邊，似乎暗示今晚有力爆冷！雖然佢哋有中場阿達美亞同守將科斯頓舒侯斯傷愈復出，但睇佢哋近3場都未贏過兼場場失波，今晚想喺衞冕德甲冠軍身上製造驚喜戰果，似乎妙想天開！