搭禾堡反彈順風車

猪拉多纳

今晚德甲黑柴唔做複雜嘢，繼續乘搭禾夫斯堡反彈順風車，呢班波自馬加夫被炒後脫胎換骨，相信仲有排贏，今晚作客面對態沉嘅紐倫堡贏面極高，平手盤撐客軍禾夫斯堡。

（周六晚10時30分開賽）

禾夫斯堡炒咗馬加夫，起用助教高斯拿接手，成班球員恍如走出地獄，開心到不得了，先喺德甲作客4比1大炒杜塞爾多夫，跟住德國盃兩球輕取FSV法蘭克福，中場迪亞高一射一傳成關鍵人物，雖然對手實力唔算強，但佢開心到瘋狂慶祝，成班球員亦一齊擁抱高斯拿，足見呢位替工主帥幾得人心，目前禾堡眾將最大心願，係希望能夠令會方改變聘請名帥嘅初衷，繼續畀機會高斯拿執教，要做到呢點，就一定要取得更好成績，目前全隊鬥志一流，絕對值得追捧。
紐倫堡態沉難頂

紐倫堡情況相反，近6場聯賽只係主場喺弱旅奧格斯堡身上攞過1分，近4場聯賽都冇波入，教練赫基已經面臨沉重被炒壓力，最慘係球隊精神領袖門將舒希化繼續養傷，今仗後防大將賓路拿亦累積5面黃牌要停賽，面對強勢反彈嘅禾堡好難頂得住。