昆士柏流浪雷丁演入球騷

猪拉多纳

英超周日九點半場上演榜尾大戰，由華而不實嘅昆士柏流浪主場鬥實而不華嘅雷丁，主隊執埋一堆過氣球星，充斥大牌低能之輩，教頭曉士聞到魷魚香，個勢咁頹，讓波打死都唔買！雷丁上場同阿仙奴喺盃賽踢出網球比分，入得失得，今鋪一於再玩大！

（有線300及200台周日晚9時30分直播）

昆士柏流浪今夏瘋狂增兵，保辛華及朴智星等人名氣大、機器壞，呢類球員畀大會榨乾榨淨，已經踢唔番最佳水平，加上新兵多，需要時間磨合，搞到季初脫腳，主帥曉士壓力好大。當然，佢哋啲新兵並非個個都唔掂，前皇馬中場格尼路傳射都掂，前國米門神施薩索拉斯仍然有料到，但最麻煩係條防線不穩，今次大舊中堅麥比亞停賽，要搵老將賴恩尼爾遜同安頓費迪南扼守中路，堅靠唔住！
雷丁近兩仗入7球

雷丁上周聯賽盃同阿仙奴激戰到加時慘輸5比7，曾經領先4粒都畀人追和，後防當然有問題，不過，樂觀啲睇，佢哋喺「兵工廠」身上轟入4粒，加埋上周聯賽鬥富咸踢成3比3，兩場入7球，火力好猛噃！雷丁班兵冇乜名氣，但射手羅拔斯上場搞到阿仙奴後防亂晒龍，搏起上嚟唔係人咁品！兩軍今季於聯賽盃交手，雷丁作客贏3比2，兩支降班熱門再戰，有望上演另一場入球騷。