殘車難捉畫眉鳥

猪拉多纳

車路士作客「畫眉鳥」西布朗，車仔陣中多位主力剛於周中為國出征，下周中又要喺歐聯生死戰作客祖雲達斯，領隊迪馬堤奧今仗難免要畀部分主力休息，以佢哋近三場聯賽不勝弱勢，仲要半力出擊，想贏相當困難，Mic少捧受讓半一嘅西布朗下盤。（有線301及201台周六晚11時直播）

車仔陣中多國腳，往往成為國際賽檔期受害者，最大鑊係三位巴西兵拉美利斯、奧斯卡杜斯山度士及大衞雷斯周中都遠赴美國，同哥倫比亞踢熱身賽，近況大勇嘅桑馬達亦隨西班牙去巴拿馬比賽，佢哋坐長途機飽受舟車勞頓、時差之苦，夠晒傷身，鑑於下周中歐聯硬撼祖記不容有失，相信迪馬堤奧今仗唔會「夫添」出擊。
西布朗領隊熟晒車仔

西布朗上季主場贏過車仔，今季進一步「升呢」，全因領隊奇勒有料到，主場贏利物浦及愛華頓唔係符碌，證明遇強有辦法，加上奇勒熟晒車仔，喺車仔効力多年又做過助教，主場實有計嘅！