法芬效忠史浩克High爆

猪拉多纳

Alwin係賀芬咸同史浩克04球迷，今日好興奮同大家講兩個關於我愛隊嘅好消息，第一個來自史浩克，我哋嘅秘魯球星法芬已經決定長期留隊，佢上季曾經扭計希望轉投更有實力球會，態度同演出都曾經令擁躉失望，不過佢啱啱喺史浩克置業，同家人一齊入住一間令佢非常滿意嘅新購大豪宅，現時佢已經全心全意向住球會，佢喺記者會度話：「我喜歡史浩克，喜歡呢度嘅球迷，希望長期留効，亦希望能夠協助球隊贏得更重要嘅錦標，雖然好多人話今季拜仁實力超群，不過我認為排第二位嘅史浩克一樣有機會挑戰德甲錦標，不過我哋已經落後拜仁7分，現階段已經冇失分空間。」
作客利華古遜坐和望贏

史浩克今晚會喺德甲作客遇上勁敵利華古遜（有線61、64、201及204台周日凌晨1時30分直播），球隊上仗險勝雲達不來梅後士氣返晒嚟，陣中主力法芬、亨特拉爾、紐斯泰達同達斯拿周中喺國際賽日都得到休息，小將賀治比喺德國隊擔正只會令佢更加興奮，雖然阿費利為荷蘭出師受傷今晚唔踢得，但球隊兵源充足，今晚強勢作客利華，可趁對手有舒華比同卡特歷一對二閘缺陣攞着數，平手盤捧史浩克坐和望贏。
賀芬咸波利斯胡錫域醒番

Alwin收到嘅另一喜訊來自賀芬咸，較早前因車禍命危嘅中場波利斯胡錫域，不但喺較早前度過咗危險期，尋日仲從多日昏迷後甦醒番，雖然頭部傷勢距離康復仲有漫長路要走，但進展已令人欣喜。全隊球員話咗聽晚對禾夫斯堡會為佢奮戰。
Alwin推介：

史浩克04平手盤 ★★★★

漢諾威勝 ★★★★

法蘭克福勝 ★★★