紅魔主力抖夠係時候反彈

猪拉多纳

昆士柏流浪同曼聯係蚊髀同牛髀，根本冇得比，但兩隊近期齊齊做哀兵，兩連敗嘅「紅魔」喺歐聯留力輸波，就係要喺英超谷底反彈，內憂外患嘅QPR整定冇運行！

老謀深算嘅費Sir點會喺無關痛癢嘅歐聯分組賽「嘥彈藥」，兼且加拉塔沙雷主場出晒名夠惡，佢老人家咪當畀機會啲後生仔踢練習賽，所以輸波冇所謂，反正依家咁頻密嘅賽序中，嚟緊又要應付周中快車，難得畀班主將抖吓，簡直係久旱逢甘露！

費Sir為曼聯帶嚟輝煌戰績創造紀錄，佢嗰位學藝未精嘅徒弟仔曉士亦「唔執輸」，幫QPR創咗頂級聯賽最糟糕開局0勝4和8負，依家得4分，結果尋晚球會高層終於忍唔住，決定請佢食無情雞，講真帶咗12場先炒曉士算係畀多咗佢！事實上，QPR攻不銳、守不穩，加上群龍無首下，去到奧脫福輸少啲已經叫做交足貨！