史雲斯打擊老翻再砌紅軍

猪拉多纳

兩隊波同打法，一隊已經成形、一隊仲磨合緊，成形嗰隊主場受讓，你會點揀？今輪英超利物浦作客史雲斯，雖然蘇亞雷斯弗爆，但防守勁曳讓波擇使。本月初史雲斯在聯賽盃造訪晏菲路贏得輕鬆，加上有中場寄誠庸復出，捧史雲斯「讓球主勝」！

（有線300及200台周日晚9時30分直播）
羅渣士畀舊會食住

羅渣士花兩年時間教到史雲斯踢到曉飛，去季震驚整個歐洲球壇，本季轉教利物浦。去到紅軍，羅渣士照辦煮碗，將小組足球理念套落新東家身上，目前半季未過，利物浦仍只得其形、未得其神；球隊攻力係有所改善，踢法亦悅目咗，但後防就甩漏頻頻，12場聯賽失16球之多。

羅帥雖然離開，但史雲斯踢法已經成形，一班主力闔埋眼都識進攻，加上領隊米高盧特立好有眼光，本季引入價廉物美嘅米捷同柏保路靴南迪斯，本季仍有不俗表現。早前聯賽盃作客紅軍，雖然對手陣容不整，但史雲斯贏得好有說服力，加上「天鵝」本季主場不敗率高達九成，今場受讓筍爆，進取啲可直取過3倍嘅主W。