曼城嗒粒拖肥追榜首

猪拉多纳

今季英超睇來再次成為曼市雙雄之爭，論人腳資源，無疑曼城佔優，而且佢哋已於歐聯出局，更加可以集中火力爭聯賽，現時只落後榜首紅魔鬼1分，反超前機會仍樂觀。不過曼城今晚主場遇上「豬頭骨」愛華頓並唔易啃，估計小勝一球居多，一於博3.5倍「讓球和」。

（有線300及200台周六晚11時直播）
愛華頓火勁「大」得起

曼城進攻球員人才濟濟，但入波效率唔高，好大程度上因為領隊文仙尼經常轉換鋒線組合，當中以起用「契仔」巴洛迪利最為敗筆。雖然「腦殘」上仗入波，但佢水準太唔穩定，以往浪費好多入球機會。反而把握力較強嘅迪斯高經常只能屈居後備，實在嘥料，因此曼城今季好少可以大炒對手。

當然愛華頓近期氣勢已經冇季初咁勇銳，近八場聯賽僅一勝，甚至作客輸畀雷丁，好難期望佢哋能夠喺曼城身上取得分數。不過「拖肥糖」勝在鬥志頑強，要擊敗佢哋亦要花一番工夫，就算輸波亦唔會大敗，度士認為今場好可能輸1比2。考慮到愛華頓入球能力亦不俗，除咗「讓球和」之外，入球大亦可取。