西維爾半力照殺華拉度列

猪拉多纳

今晚淨係得八場波，阿King就睇中場西甲獨腳戲，喺自己地頭分外Sharp醒嘅西維爾，今仗雖有4名球員停賽，但前線柏洛迪、尼格度、捷西斯拿華斯近期着晒火，遇上作客曳極嘅華拉度列，可謂強弱分明，應可予取予攜，主勝冇難度。（周二凌晨4時30分開賽）
華拉度列離開主場就腳軟

上輪聯賽西維爾作客馬體會賠了夫人又折兵，慘吞四蛋之餘，仲有法斯奧、安東尼奧隆拿、拿傑迪錫先後被逐，連同中堅史柏希斯，4人今仗齊齊坐波監，令主帥米高喺排陣上捉襟見肘。不過，西維爾今季主場勁惡，除咗輸畀巴塞及同利雲特悶和外，其餘對手造訪都要擺低3分，包括上季盟主皇馬！西維爾嘅年輕翼鋒柏洛迪自傷愈後，演出漸入佳境，同捷西斯拿華斯、尼格度合組嘅鋒線，火力強大，近4仗轟入9球，就算有4人停賽，亦不容小覷。相反，華拉度列一離開主場就腳軟，近六作客輸咗五場，真係未踢先怯，今仗並有軒歷基沙蘭奴同馬斯華利安迪因傷缺陣，難有本錢搶分，簡單要個主勝。
多德勒支直取「半場大」

荷乙方面，多德勒支近期入得又失得，面對防守唔太穩嘅阿高夫，勢必合演入球騷，但大盤冇乜肉食，直取「半場大」。

最後阿甲春學生隊主場戰績不俗，對住作客只係贏過包尾大幡聖達菲聯嘅聖馬田聖祖安，主勝實食冇黐牙。