富咸拆「紐」鬥心爆棚

猪拉多纳

領隊下令踢得好至搞聖誕Party

富咸提早賀聖誕！雖然距離聖誕節仲有兩個星期，但富咸領隊祖爾為咗激勵士氣，提早扑錘批准球員開聖誕派對，諗住趁早慶祝完好好迎接英超快車賽程，加上有3件主力復出，對住今季不設防嘅紐卡素，有權開1.8倍主勝！

（有線200、300及廣東體育周二凌晨4:00直播）
提早慶祝免影響快車戰績

正當昆士柏流浪領隊夏利列納下令取消聖誕派對，全力備戰護級，近7場得4和3負嘅富咸選擇畀球員抖吓，教頭祖爾承諾准球員玩餐飽，條件係先搏命為球隊扭轉頹勢，同埋要提早慶祝，避免影響英超快車期間嘅戰績。其實球員都係打工仔，聖誕節又係歐洲重要節日，祖爾咁識做球員實撐佢。
紐記鬥倫敦球會輸多贏少

或者各位會擔心，前鋒拜仁雷斯受傷要抖5個星期，後衞基謝拉因傷提早退役，將會嚴重影響富咸爭勝能力。但唔好忘記，司職中堅嘅隊長軒治蘭特坐完3場波監可以復出，中場卡加尼基歷同右閘沙斯查列達齊齊傷愈，講到底，富咸有曾經做過英超神射手嘅貝碧托夫壓陣，呢場係時候發威！

紐卡素方面，射手丹巴巴亞、中場賓艾化同奧巴坦剛啱好番，落到場唔知有幾多戰鬥力，加上中場卡比耶同後衞史提芬泰萊養緊傷，更加博唔過，特別係紐記近7次對倫敦球會，只得2勝5負收場，包括上季作客以2:5慘負富咸，今季作客又未開齋連盃賽得7和5負，好易出事o架！