病貓獻細 迎雷丁水鬥水

猪拉多纳

新特蘭冇費查 迎雷丁水鬥水

冇史提芬費查「黑貓」新特蘭變病貓，入波唔慌多！周三凌晨英超獨腳戲，新特蘭主場撼雷丁，主隊續有該王牌射手缺陣，無論搵域咸或沙夏頂檔，效果都差得遠，入波板斧少到喊。雷丁作客必大放悶彈捧細。

（有線300及200台周三凌晨3時45分直播）

奧尼爾本季老貓燒鬚，搞到新特蘭變一人球隊，似乎神奇不再。「黑貓」本季引入前鋒史提芬費查，成班波就靠晒佢入波，開咧頭2個月，除咗佢之外冇「黑貓」球員聯賽入過波，聽落都得人驚。目前佢有傷在身繼續缺陣，球隊就好似盲頭烏蠅一樣，雖然個個都不惜氣力瞓身進攻，但就硬係冇人處理埋門一腳。睇埋英超數據，「黑貓」本季７場主場僅入６球，其中１球更係對手烏龍波，攻力曳到點，大家心中有數。
雷丁作客死守博一分

雷丁早前同曼聯癲鳳鬥狂龍，半場雙方夾埋已入７粒，但該仗雷丁喺自己地頭出戰，先有咁神化演出，作客冇咁醒神。呢支係典型弱隊專搏主場，一作客就博１分，近５次作客４次開細。今場榜尾球隊交鋒，話係護級大戰言之尚早，雷丁攞１分於願足矣，唔會改變踢法；加上大隻佬鋒將普格恩耶克仍然缺陣，今場吼細盤。