阿仙奴盃仔當大賽

猪拉多纳

今晚英格蘭波百花齊放，有英超、足總盃、仲有聯賽盃，其中聯賽盃已到8強階段，阿仙奴有運作客遇上乙組仔巴拉福特。兵工廠英超爭標無望，捧歐聯太過奢望，想打破7年錦標荒，惟有向本土盃仔埋手，應會出真功夫爭勝，為雲格以至球會管理層減壓，炒得起對手，要「讓球客勝」。（周三凌晨3時45分開賽）
炒得起巴拉福特

阿仙奴對上一次有盃落袋，已經係05年足總盃，以佢哋堂堂英超豪門，多年來冇盃捧，成為球壇笑話，亦令球迷好不滿。球會管理層同領隊雲格雖然口口聲，話冠軍唔代表一切，但內心都好想捧盃，以息民憤。聯賽盃屬於競爭性最低本地賽事，亦係兵工廠最有機會爭冠嘅賽事，相信佢哋會認真對待，要淨贏乙組巴拉福特兩球或以上，應該冇問題。

另一場聯賽盃8強，諾域治主場對阿士東維拉，諾軍主場5連勝，包括擊敗阿仙奴、熱刺同曼聯，絕對唔講得笑。維拉聯賽受降班威脅，無力兼顧盃賽，主W可取。足總盃第2圈重賽，甲組諾士郡主場對乙組洛達咸，諾軍上次作客被逼和1比1，優勢唔明顯，而且球隊守強攻弱，捧細較穩陣。