|
|
今晚西班牙盃16強首回合焦點，肯定落喺皇家馬德里作客切爾達嘅全西甲對戰上，力奇睇好主隊頂得住「銀河艦隊」，事關皇馬要兼顧3路戰線，今仗難免收起正選，作客出擊仲要讓波，我寧願捧2.8倍「讓球主勝」好過。
（now632台周四清晨5:00直播）
冇錯，皇馬近排取得4連勝，但西盃贏低組別艾高恩奴同歐聯砌低篤定出局嘅阿積士，參考價值唔高，到上周末作客華拉度列，經歷兩度落後先反勝3:2，真係畀佢嚇餐死o架。當然，相比起首圈起用大批小將，皇馬今晚對切爾達個陣容點都會執番靚啲，不過啱啱先復操嘅左閘法比奧干查奧，日前同助教嘈咗幾句，今晚相信都唔使預，中後場靠卡維奴同卡卡呢班雪櫃兵，點都係靠唔住。
仲有，佢哋上仗贏波後，就公開投訴執法球證枉判沙治拉莫斯入波越位，雖然事後賽會都知道錯判，冇話對皇馬批評球證嘅行為處分，但搞到咁高調，球證對皇馬所有犯規隨時會格外「執正」嚟吹，都咪話唔麻煩。
切爾達近7次主場不敗
切爾達呢邊，主帥柏高夏里拉話明唔會放軟手腳，全力爭創奇迹。陣容方面，雖然中場阿歷士盧比斯同守將森美爾洛卡養傷唔踢得，但之前受腹痛困擾嘅阿根廷中場奧古士圖費南迪斯預計可趕及復出，最緊要係佢哋今季主場戰績出色，除咗開咧戰輸畀馬拉加0:1外，之後7次主場戰係取得4勝3和不敗，點使驚皇馬！ |
|
金睛卡
发表于 2012-12-12 10:11
变色卡
显身卡
楼主