ＡＣ博意盃「-1」醒里

猪拉多纳

今日賽事唔多，但不乏好嘢，其中近況回勇嘅ＡＣ米蘭值得留意，該隊今晚喺意盃16強返主場對住里賈納，由於意甲爭標無望，歐聯又強隊林立，意盃成為呢支褪色勁旅嘅現實選擇，喺入球停不了嘅艾沙拉維帶領下，要炒連乙組都踢唔掂嘅里賈納有何難？阿King強捧1.65倍「讓球主勝」。

（now 633周五凌晨4時直播）

經過災難性開局後，ＡＣ米蘭近三場聯賽全勝，總算重上正軌，但與榜首祖雲達斯相差14分，相信教頭阿里基唔會癡心妄想，只求力爭前三歐聯席位，因此意盃忽然成為重要錦標。除了「小法老」艾沙拉維持續爆發外，幾名主力如羅賓奴、奇雲保定、洛斯連奴均有回勇迹象，特別係鐵腰尼祖迪莊因傷長抖，阿帥重新起用洛斯連奴任防中，有助鞏固防守。
里賈納乙組未踢掂

相反里賈納實力差幾條街之餘，連乙組都踢唔掂，依家只沉淪於第17位，邊有閒情逸致爭意盃？何況ＡＣ米蘭過去六次喺聖西路對住里賈納，贏足五次，擺明食住對手，呢場炒得起里軍，必選「讓球主勝」。至於西盃方面，利雲特前鋒馬田斯勒都勒唔住，對手薩拉戈薩周二才作客硬撼完華歷簡奴，連續作客未回得切氣，捧主勝。另一場西乙分子拉斯彭馬斯近八仗未輸過之餘，防線固若金湯，主場出戰剛與巴塞激鬥嘅貝迪斯，可謂以逸待勞，「讓球主勝」超筍值博。