切爾達搏殘難剋迪

猪拉多纳

今晚西甲壓軸尾場，兩支近期曾勇挫皇馬嘅球隊切爾達同貝迪斯狹路相逢，不過前者上周中西盃鬥「銀河艦隊」搏得太盡，球員未回得切氣，相反貝迪斯深明留放之道，眾將養精蓄銳冇有怕，加上近年作客切軍甚少輸波，今仗有得受讓筍到爆，「讓球客勝」有計。

（now 632周二凌晨4時30分直播）

主強客弱係切爾達嘅特性，除咗揭幕戰輸畀馬拉加，該隊今季所有主場賽事未輸過，當中仲贏咗5場，包括上周中西盃16強首回合2比1擊敗皇馬，可見佢哋喺自己地頭打得分外Sharp醒，但由於拚盡全力唔識收，對手皇馬又踢得非常粗野，搞到切軍傷疲多多，今仗仍有阿歷士盧比斯同森美爾洛卡因傷缺陣，主場出擊都信唔過。
貝迪斯主將叉足電

貝迪斯教頭梅爾就醒得多，自知板櫈深度不足，唔夠人手兩線作戰，惟有作出適當輪換。好似上周中西盃作客乙組仔拉斯彭馬斯，佢特登收起兩大核心魯賓卡斯度同比納特，擺明留力hea踢，直到下半場才派兩人落場輕舒步頭，令球員喺密集賽程底下，保持體力及對球賽嘅飢渴感，其中前鋒魯賓卡斯度近8仗入8粒，腳風勁順，難怪連皇馬都砌低喇。況且「綠白軍」近4次作客切爾達，有3場不敗而回，喺實力、近況、往績俱佳下，仲有得受讓，呢個「讓球客勝」不容錯過。