胡森新年新標誌

猪拉多纳

尋日2013元旦戰，英國騎練認真威水，先有祁義理開齋，之後輪到胡森喺第三場爆咗隻半冷W「新標誌」，新一年有個好開始。其實胡森以往都會返祖家度過聖誕同埋新年，但係尋日就特登趕返嚟入場督師，結果真係有回報，贏到佢今季第9W。
       
新標誌半冷取勝姿態輕鬆。

賽後佢話「新標誌」初出嗰鋪都跑得唔錯，上次就因為外檔全程走蝕位先至跑得唔好，今勻抽番個好位兼可以守好位，加上郭立基跟足指示發揮，贏馬補中都好合理。胡森仲話好開心同「新標誌」嘅馬主余振康贏馬，事關余生同佢大佬胡活士相識多年，大家都好好朋友，所以幫佢建功特別興奮。
       
胡森

另外，胡森覺得「新標誌」性能偏長，之後跑到1800米或以上路程都冇問題，之不過今仗只係普通嘅四班賽，呢隻馬都要再有進步先至可以繼續交到好成績。