薛達志強中堅破悶局

猪拉多纳

德國練馬師薛達志自從喺11月28號贏咗隻「好球」之後，一直都再無進帳，雖則試過有「競技英雄」先過終點，但係因為阻到「太奇妙」貶咗落第二，連薛達志都大感冇癮。
       
德國練馬師薛達志

卒知等到2013年元旦戰，佢終於否極泰來，喺第八場靠郭能騎咗隻「強中堅」建功，後上殺低落飛到大熱門嘅「博愛福星」，兼幫佢打破逾一個月嘅悶局。
       

賽後薛達志表示今次趕返香港督師即刻有馬贏，梗係好開心，佢覺得「強中堅」本身都有啲質素，事關初出已經可以喺谷草一哩入Q，之但係呢隻馬跑法比較被動，又容易緊張，似乎谷草唔係好啱發揮，所以決定轉咗沙田再搏，終於證明部署奏效。薛達志話今仗郭能固然騎得好，但係「強中堅」亦都跑到水準，佢話只要隻馬情緒可以再放鬆啲，長遠嚟講肯定係一隻唔錯嘅馬。