馬拉加數爆伊巴

猪拉多纳

聯賽失威 西盃補鑊

今晚六場開盤賽事盃賽當道，阿King對西盃十六強次回合賽事特別有心水，馬拉加歇冬後第一擊作客輸畀尾二拉科魯尼亞，肉酸到爆，班大帝被教頭比歷連尼省到立立令，難得今晚喺主場只係對丙組仔伊巴，必定趁機大勝一仗挽面子，「讓球主勝」捧得過。

(周三凌晨2時30分開賽)

由於首回合打和1比1，有個作客入球在手，因此馬拉加今仗互交白卷都可晉級，但佢哋日前西甲作客拉科演出失常，一向穩陣嘅中堅迪米捷利斯同維列頓頻頻甩漏，前線祖亞昆、辛達告魯斯及歐洲金童獎得主伊斯高猶如夢遊，最終輸波屬咎由自取，教練比歷連尼鬧爆球員不知所謂。呢班球星畀人鬧醒後，一定要做番啲嘢，今晚只係對住丙組仔伊巴，唔會甘於0比0和波出線，點都想贏番場漂亮勝仗博反彈，戰意十足下，「讓球主勝」冇難度。
華倫揸住兩球歎「細」界

另一場西盃次回合，華倫西亞日前聯賽打多一個，卻要搞到末段先反勝弱旅CF格蘭納達，演出差勁兼耗力不少，其對手奧沙辛拿聯賽排包尾，寧願留番啖氣護級好過喇，邊得閒爭盃賽，加上華倫領先緊兩粒唔會同你急，雙方鬥hea下揀細盤。

最後英錦賽八強牛津聯主場迎戰修安聯，後者近七作客只曾一敗，加上近年對碰又食住牛軍，梗係要「讓球客勝」。